Unofficial "Open Book Exam"??
沒說不可，為何不可？！
好不主席：出（色好）貓
蘋果日報 2011年11月23日
毅行當日，又見行政會議成員陳智思，其實呢幾年都係由佢主持開步禮，佢自己亦都行過 5次毅行者，「有心人」也。如果唔係心繫起步準備，本來想同佢寒暄兩句，藉機問吓佢會支持召集人定前司長？仲有前排《金融人語》報道，佢為咗喺內地獲取金融機構主管資格，竟要重考嘅「事」。各位唔好誤會我存幸災之心，只係吾亦過來人，感同身受而已。
話說幾年前我們與內地背景公司在沿海城市成立了一間 JV（合資經營），雙方各派代表進場，分居要職。對家老闆名義上是董事長，而我就係總經理，本來諗住掛名交差，點知公司經營範疇包括金融諮詢服務，所以高管人員，包括我都要向相關單位申請並需考取職業資格，不過董事長一職就唔知點解唔使，原來職務安排有此考慮！
明目張膽睇答案
當日去到考場，其實係負責單位的寫字樓所在，跟着有人領我到一間偌大的會議室，然後個幾兩個鐘，就淨係空空蕩蕩得我一個喺裏面孤軍作答。試卷內容豈止陳智思所要應付的幾條題目，而是好幾十條選擇題。內容雖然都是同事早為我預備雞精讀本的範圍，但答案鋪排確實經過一番精心部署，因為幾近一樣，其「魚目混珠」程度，媲美電玩遊戲「找不同」。所以我當時心想：個試使唔使咁「認真」？
考卷每次都一樣
過了兩天，機關方面就通告成績，我考得並不差……下次再考一定及格！唔係啩，又要補考？驚聞噩耗，心情激盪，跟着便叫同事隨即安排補考時間，他還輕描淡寫的說：「考卷只一份，補考試題，其實都一樣。」知道有此厚待我亦顏開不了：「就算再考一次，那些似是而非的答案，還不是同樣的撲朔迷離。」他一面狐疑問：「我不是準備了應考內容給你了嗎？」「就是嗎，我可花了不少時間反覆熟讀。」然後他更不解的再問：「你全念了？但那其實是給你考試當中翻查答案之用。」
差點暈了，怪不得連一個監考都沒有，反正就是做做樣子。果然不論黑貓白貓，敢於明目「出貓」就是好貓！
盧先亞
沒有留言:
發佈留言