香港前路

到底我們想要冒風險搞革命？還是繼續做好這份工？

中門大開： Restoration

蘋果日報 2011年11月28日

念英國文學的人都知道，復辟時期文學名作除《天路歷程》、《失樂園》之外，也出現大量喜劇，諷刺新貴言行，稱為 Comedy Of Manners。香港政治也面臨董朝復辟時代，相信日後一班新貴言行，也會為黃子華、詹瑞文、張達明及胡恩威提供新素材。

香港人政治幼稚病，與媒體有莫大關係。范太起初民望高企，愚弄巿民，將傳媒玩弄為自己造勢，傳媒總之有古仔就乜都寫，冇標準可言，造就了范太空手套利，只不過她越玩越以為世界跟隨自己轉，最終像小露寶得意忘形自行出煙壞機收場。振英會是另一個小露寶，起初還小心翼翼，放下身段討好傳媒，投巿民所好，齋噏都攞到四成民望，似足范太空手道。但振英政治路線隨着班底曝光，原來係董班子敗部復活，大家要金睛火眼睇清楚。

天路歷程 vs失樂園

所謂董建華問題未解決，係因為有一股「怨氣」，振英掌權後將會引發利益全方位重組。好簡單例子，當李國章或羅范椒芬重掌教育，前朝種下的恩怨又再臨，現任局長孫公苦心經營休養生息，同全港最大教師工會教協休戰局面結束，一旦教改大旗又再飄揚，教育界要準備打仗了，張文光恐怕難實現退下火線計劃了。至於政務官系統就更加難搞，煲呔任內提拔政務官出身的局長，會被換走或自己離開，假如由一班不受尊重的退休公務員「翻閹」當問責官員，政治後果可想而知。

特區政體乃全球獨有，只得半桶水民主，但又有全方位自由，係中國城巿，但又係國際商貿金融中心，美國同中國暗中較勁角力之地。煲呔之所以捱到今日仍未腳痛豈靠幸運，而董之所以失敗，就係應咗毓民金句「四方樹敵、八面威風」，將建制利益打爛，但又欠缺足夠政治力量、基礎及策略去完成重組，最終變成人人受折騰。相反煲呔係先穩住建制，逐步改，賣地與居屋政策係好例子。 80後社運、社民連衝擊，只係表面嘢，實際特區政治秩序幾穩定。

香港政局未來，究竟唐梁兩條路線，邊條係天路歷程，邊條係失樂園，大家諗清楚！

添馬男